Plantun de Prouvènço

Pèr coumpara dos planto d'encò nostre

Bupleurum fruticosum & Plumbago europaea

Lengo-de-cat

Bupleurum fruticosum

Apiaceae Umbelliferae

Àutri noum : Auriho-de-lèbre, Fenoui-de-colo, Taco-bugado.

Noms en français : Buplèvre arbustif, Buplèvre ligneux.

Descripcioun :
La lengo-de-cat es un aubret, souleto Apiaceae coum'acò au nostre, que trachis dins li relarg secarous e cauquié. Si fueio an ges de péu, soun verdalo dessouto, e se ié vèi bèn li costo segoundàri (fotò). Li brout (oumbello) an de 7 à 20 rai. Lou fru, negre un cop madur, porto de costo que se vèson bèn.

Usanço :
Li racino e li fru sarien bon pèr lucha contro lou tussi, l'asme, e pèr ajuda à pissa. Se dis meme que lou fru èro emplega contro li pougnaduro de vipèro.

Port : Aubret
Taio : 1 à 2 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Bupleurum
Famiho : Apiaceae
Famiho classico : Umbelliferae

Ordre : Apiales

Coulour de la flour : Jauno
Petalo : 5
Ø (o loungour) enflourejado : 10 à 12 cm
Flourido : Estiéu

Sòu : Ca
Autour basso e auto : 0 à 1200 m
Aparado : Noun

Liò : Garrigo - Roucaio - Tepiero seco
Estànci : Mesoumediterran
Couroulougi : Estenoumediterranenco
Ref. sc. : Bupleurum fruticosum L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.